Shpërndarja e vaksinave kundër COVID-19 është e një rëndësie parësore për çdo komb dhe transporti i vaksinave përtej kufijve po bëhet operacioni më i madh dhe më i shpejtë në botë ndonjëherë.Rrjedhimisht, ekziston rreziku që sindikatat kriminale të tentojnë të shfrytëzojnë situatën.

Në përgjigje të këtij rreziku dhe për të adresuar kërcënimin e paraqitur nga produktet ilegale si ilaçet dhe vaksinat e rrezikshme, nën standard ose të falsifikuara, Organizata Botërore e Doganave (WCO) sapo ka nisur një iniciativë të re të titulluar “Projekti mbi nevojën urgjente për lehtësim dhe kontrollin e koordinuar doganor të ngarkesave ndërkufitare të lidhura me COVID-19”.

Qëllimi i këtij projekti është të ndalojë dërgesat ndërkufitare të vaksinave të rreme dhe mallrave të tjera të paligjshme të lidhura me COVID-19, duke siguruar njëkohësisht lëvizjen e qetë të dërgesave përkatëse legjitime.

“Në kontekstin e pandemisë, është thelbësore që Dogana të lehtësojë, në masën më të madhe të mundshme, tregtinë legjitime të vaksinave, ilaçeve dhe furnizimeve mjekësore të lidhura me COVID-19.Megjithatë, Dogana ka gjithashtu një rol përcaktues për të luajtur në luftën kundër tregtisë së paligjshme të mallrave të ngjashme nën standarde ose të falsifikuara për të mbrojtur shoqëritë,” tha Sekretari i Përgjithshëm i OBD-së, Dr. Kunio Mikuriya.

Ky projekt është pjesë e veprimeve të referuara në Rezolutën e Këshillit të WCO-së të miratuar në dhjetor 2020 mbi Rolin e Doganave në Lehtësimin e Lëvizjes Ndërkufitare të Barnave dhe Vaksinave kritike për situatën.

Objektivat e saj përfshijnë zbatimin e një qasjeje të koordinuar doganore, në bashkëpunim të ngushtë me kompanitë prodhuese të vaksinave dhe industrinë e transportit, si dhe me organizata të tjera ndërkombëtare, për kontrollin e flukseve tregtare ndërkombëtare të këtyre mallrave.

Gjithashtu nën këtë iniciativë është parashikuar përdorimi i versioneve të përditësuara të aplikacioneve CEN për të analizuar tendencat e reja në tregtinë e paligjshme, si dhe aktivitete për ngritjen e kapaciteteve për të rritur ndërgjegjësimin mbi tregtinë e vaksinave të rreme dhe mallrave të tjera të paligjshme.